Ош регионалдык башкармалыгынын инспекторлору тарабынан ыкчам рейд өткөрүлдү
27-январь 2025, 17:23
2025-жылдын 26-январында Жаратылыш ресурстары, экология жана техникалык көзөмөл министрлигине караштуу Экологиялык жана техникалык көзөмөл кызматынын Ош регионалдык башкармалыгынын инспекторлору тарабынан Кара-Суу районунун Тар-Жылга, Шут жана Кашка-Суу участкаларында ыкчам рейд өткөрүлдү.
Рейдге Ош регионалдык башкармалыгынын инспекторлору жана Набу уюмунун Барс 2 тобунун кызматкерлери катышты. Рейддин жүрүшүндө аң-уулоо эрежелерин бузган жана тийиштүү уруксат кагаздары жок болгон 3 жаран аныкталды.
Тийиштүү мыйзамдардын негизинде, аталган жарандарга КРнын Укук бузуулар жөнүндө кодексинин 263-беренесине ылайык 37500 сом суммасында административдик айып салынды. Ошондой эле, мыйзам бузууну алдын алуу жана аң-уулоо эрежелерин сактоо боюнча түшүндүрүү иштери жүргүзүлдү.
Экологиялык жана техникалык көзөмөл кызматы тарабынан жүргүзүлгөн мындай рейддер өлкөнүн жаратылыш ресурстарын жана экологиясын коргоо максатында үзгүлтүксүз жүргүзүлүп, мыйзамсыз аң-уулоону жана жаратылышты бузуу аракеттерин алдын алуу үчүн күчөтүлө берет.
Жаратылышты коргоо жана мыйзамдуулукту сактоо боюнча дагы маалыматтар алуу үчүн, жарандарды Экологиялык жана техникалык көзөмөл кызматына кайрылууга чакырабыз.
