Борбордук лабораториянын эл аралык кызматташтыгы

Кыргыз Республикасынын Жаратылыш ресурстары, экология жана техникалык көзөмөл министрлигине караштуу "Борбордук лаборатория" мамлекеттик ишканасынын директору Мурзабеков Кантемир Зулумовичтин И. Раззаков атындагы Кыргыз мамлекеттик техникалык университетинин ректору Чыныбаев Мирлан Койчубекович менен жумушчу жолугушуусу болуп өттү. 

Жолугушууда лаборатория менен университеттин ортосундагы кызматташтыкты өнүктүрүү талкууланды. 

Тараптар жаратылыш ресурстары жана аларды сарамжалдуу пайдалануу менен байланышкан актуалдуу маселелерди чечүү үчүн биргелешип иштөөнүн маанилүүлүгүн баса белгилешти. Атап айтканда, бул багыттарда жаңы бийиктиктерге жетүү үчүн өзгөчө тоо-кен тармагында квалификациялуу адистерди тартуу зарылдыгы белгиленди. 

Жолугушууда ошондой эле илим, өндүрүш жана технологияны бириктирген "өз ара аракеттенүү үч бурчтугу" модели тааныштырылды. Бул концепция практикалык маселелерди чечүү үчүн илимий жетишкендиктерди натыйжалуу пайдаланууга багытталган. 

Мындан тышкары, студенттер жана окутуучулар үчүн биргелешкен изилдөөлөрдү, стажировкаларды уюштуруу жана студенттердин квалификациясын жогорулатуу мүмкүнчүлүктөрү талкууланды. Химиктерди жана лаборанттарды даярдоо сыяктуу өнөр жайдын муктаждыктарына багытталган окуу программаларын ишке ашыруу заманбап өндүрүш шарттарында натыйжалуу иштей алган жогорку квалификациялуу кадрларды даярдоо үчүн маанилүү кадам болот. 

Жолугушуунун жыйынтыгында келишимге кол коюлду, ал өнөр жай потенциалын өнүктүрүүгө жана жогорку квалификациялуу кадрларды даярдоого багытталган илим менен өндүрүштүн кызматташтыгы үчүн бекем платформаны түзүүгө карай маанилүү кадам болду.